ምርጫው ሰላማዊና ዴሞክራሲያዊ ሆኖ እንዲጠናቀቅ እየሰራን ነው-የጋሞጎፋ ዞን የፓርቲዎች የጋራ ምክር ቤት

በጋሞጎፋ ዞን 5ኛው አገራዊና ክልላዊ ምርጫ ሰላማዊ፣ፍትሀዊ ፣ዴሞክራሲያዊና በህዝብ ዘንድ ተአማኒነት ያለው ሆኖ እንዲጠናቀቅ ተቀራርበው እየሰሩ መሆኑን የዞኑ የጋራ ምክር ቤት አባል ፓርቲዎች አስታወቁ።
  የምክር ቤቱ የወቅቱ ሊቀመንበርና የኢትዮጵያ ፍትህና ዴሞክራሲያዊ ኃይሎች ግንባር (ኢፍዴኃግ) የጋሞጎፋ ዞን ኃላፊ አቶ ገዛህኝ ገለቱ ትናንት ለኢትዮጵያ ዜና አገልግሎት እንደገለጹት በዞኑ በፓርቲዎች የተቋቋመው የጋራ ምክር ቤት በምርጫ ሂደት የሚያጋጥመውን ችግር በውይይት እየፈታ ነው።
 በአርባምንጭ ዙሪያ ወረዳ በስሌና ኤልጎ ቀበሌ የኢትዮጵያ ዴሞክራሲያዊ ኃይሎች ግንባር (ኢዴኃግ) አባላት ላይ ተፈጸመ የተባለውን በደል ምክር ቤቱ አጣሪ ኮሚቴ አቋቁሞ ቦታው ድረስ በመሄድ ማጣራቱን ገልጸዋል። ደኢህዴን/ኢህአዴግ የኢፍዴኃግ ፓርቲ አባላትን በፖለቲካ አመለካከት ልዩነት አስሯል በሚል ያቀረበው አቤቱታ ትክክል አለመሆኑን በአጣሪ ኮሚቴው በኩል ተጣርቶ ለምክር ቤቱ ቀርቦ እንዲታረም መደረጉን አስታውቀዋል።
 የቅንጅት ለአንድነትና ለዴሞክራሲ ፓርቲ የጋሞጎፋ ዞን ሊቀመንበር አቶ ስጦታው ፓላ በምርጫው ሂደት የፓርቲ አባላት፣ደጋፊዎችና እጩ ተወዳዳሪዎች በፈለጉት መንገድ ተንቀሳቅሰው ፖስተር በመለጠፍ ላይ መሆናቸውን ገልጸዋል። በምርጫ ቅስቀሳው ሂደት ማንም በማንም ላይ የምርጫ ህጉን የሚጻረር ተግባር እንዳይፈጽም በጋራ ምክር ቤቱ አማካኝነት አቅጣጫ በማስቀመጥ የጋራ ችግሮቻቸውን በጋራ እየፈቱ መሆኑን አስታውቀዋል።
ምርጫው ሰላማዊ፣ ዴሞክራሲያዊና ነጻ ሆኖ እንዲጠናቀቅ የምክር ቤቱ አባል ፓርቲዎች አባሎቻቸውና ደጋፊዎቻቸው በምርጫ ህጉ ላይ ግንዛቤ እንዲያገኙ በማድረጋቸው እስካሁን የጎላ ችግር እንዳላጋጠማቸው ገልጸዋል። የምክር ቤቱ ኮሚቴ ሰብሳቢና የደቡብ ኢትዮጵያ ዴሞክራሲያዊ ንቅናቄ ደኢህዴን/ኢህአዴግ የገጠር ፓለቲካና አደረጃጀት ዘርፍ ኃላፊ በመጪው ግንቦት የሚካሄደው አገራዊና ክልላዊ ምርጫ ከመቼውም ጊዜ በበለጠ ሰላማዊ ሆኖ እንዲጠናቀቅ የጋራ ምክር ቤት አባል ፓርቲዎች እየሰሩ መሆናቸውን ገልጸዋል።
የምክር ቤቱ አባላት በዞኑ በቁጫና ዲታ ወረዳ በምርጫ ቅስቀሳ ላይ ችግር ገጥሞኛል በሚል ኢፍዴኀግ ያቀረበውን አቤቱታ እንዲያጣራ የተቋቋመው ኮሚቴ ቦታው ላይ ተገኝቶ ተፈጠረ የተባለውን ጉዳይ በማጣራት ላይ መሆናቸውን ገልጸዋል።

በጋሞ ጎፋ ዞን ደኢህዴን/ኢህአዴግ፣ ቅንጅት ለአንድነትና ለዴሞክራሲ ፓርቲ፣የኢትዮጵያዊያን ዴሞክራሲያዊ ፓርቲ፣ የኢትዮጵያ ፍትህና ዴሞክራሲያዊ ኃይሎች፣ ኢትዮጵያ ዴሞክራሲያዊ ኃይሎችና አዲስ ትውልድ ፓርቲ የምክር ቤቱ አባል ናቸው።